UFS - þætt­ir

Brú lífeyrissjóður vill starfa í sem mestri sátt við umhverfið og draga markvisst úr áhrifum starfseminnar á náttúruna og vinna að stöðugum framförum á þessu sviði.

Á árinu hóf sjóðurinn samstarf við hugbúnaðarfyrirtækið Klappir Grænar Lausnir sem þróar stafrænar umhverfisstjórnunarlausnir. Í byrjun sumars tók sjóðurinn í notkun kerfið EnviroMaster sem gerir sjóðnum kleift að safna umhverfisgögnum með sjálfvirkum hætti og auðveldar vinnu við gerð sjálfbærniuppgjörs.

Í lok sumars var gerður samstarfssamningur við Klappir um innleiðingu og þróun á hugbúnaði er varðar sjálfbæra virðiskeðju (e. Sustainable Value Chain) sem mun auðvelda sjóðnum að fylgjast með frammistöðu eignasafnsins með tilliti til UFS-þátta.

Kolefnisspor sjóðsins er reiknað í Klappir EnviroMaster kerfinu sem safnar gögnum frá upprunastað gagna eins og núverandi tækni leyfir og tryggir rekjanleika. Helstu niðurstöður uppgjörsins eru að kolefnisspor eða heildarlosun gróðurhúsalofttegunda frá rekstri sjóðsins nemur 14,2 tonnum koltvísýringsígilda (tCO2í). Losun vegna ferða starfsmanna til og frá vinnu vegur þyngst í heildarlosuninni. Næst mesta losunin er notkun á rafmagni og hitaveitu og minnsta losunin er tilkomin vegna förgunar og meðhöndlunar á úrgangi.

Unnið er að því að draga úr losun gróðurhúsalofttegunda (GHL) í samræmi við loftslagsmarkmið sjóðsins og stefnt er að kolefnishlutleysi fyrir árið 2030. Öll losun í umfangi 2 ásamt losun vegna förgunar úrgangs, viðskiptaferða og ferða starfsfólks í og úr vinnu var kolefnisjöfnuð fyrir árið 2021 á vegum Kolviðar.

Í október hafði sjóðurinn frumkvæði að innleiðingu á nýju sorpflokkunarkerfi sem auðveldar endurvinnslu fyrir alla eigendur fasteignarinnar að Sigtúni 42. Hluti af innleiðingunni var að aðskilja sorphirðuna fyrir húsið til að auðvelda sjóðnum og öðrum eigendum að fylgjast með þróun flokkunarhlutfalls og magn úrgangs. Samhliða innleiðingunni fékk allt starfsfólk í húsinu kynningu á meðhöndlun úrgangs ásamt því að farið var yfir margslungin en lítt sjáanleg umhverfisáhrif af völdum umbúða og hvernig koma skal í veg fyrir óþarfa sóun.

Flokkunarhlutfall sjóðsins var 54,4% árið 2021. Sjóðurinn hefur sett sér það markmið að ná 75% flokkunarhlutfalli árið 2022 og 95% hlutfalli fyrir árið 2030. Hluti af markmiðinu er að lágmarka almennt sorp ásamt því að draga úr heildarmagni úrgangs sem fellur til vegna starfseminnar.

Brú leitast við að stuðla að jafnrétti og jafnri meðferð starfsfólks. Sjóðurinn framfylgir jafnréttisstefnu í samræmi við ákvæði laga um jafna stöðu og rétt kynjanna.

Markmið sjóðsins er að skapa jákvætt og drífandi starfsumhverfi og verða þannig eftirsóknarverður vinnustaður fyrir hæft og metnaðarfullt starfsfólk.

Í árslok 2021 störfuðu 26 hjá sjóðnum og voru 77% konur og 23% karlar. Stjórnendur sjóðsins eru 5 en þar af eru 80% konur og 20% karlar. Framkvæmdastjóri sjóðsins er kona.

Engin starfsmannavelta var hjá starfsfólki í fullu starfi en einn starfsmaður hætti á árinu sem var í tímabundnu starfi. Ekkert vinnuslys var á árinu.

Starfsfólk sjóðsins hefur fjölbreytt val um hollan og næringarríkan hádegismat þar sem meðal annars er gott úrval af grænmetis- og veganréttum en jafnframt eru í boði ferskir ávextir og grænmeti. Lagt er upp með að starfsfólk taki með sér heim afganga til að lágmarka matarsóun. 

Starfsfólk er hvatt til að huga að heilsunni með margvíslegum hætti eins og með þátttöku í Lífshlaupinu, Hjólað í vinnuna, jógatímum og með aðgengi að jógatímum á netinu. Góð þátttaka var í Lífshlaupinu í ár þar sem starfsfólk gerði saman hinar ýmsu æfingar í hádeginu og allir hvattir til dáða í plankastöðu, hnébeygjum og fleiri styrktaræfingum. Boðið er upp á líkamsræktarstyrk og umhverfisvænn ferðamáti er verðlaunaður með samgöngustyrk. Til viðbótar hafa verið regluleg fræðsluerindi tengd andlegri og líkamlegri heilsu á vegum Vinnuverndar. Sjóðurinn tekur einnig þátt í kostnaði vegna sjálfræðiþjónustu starfsfólks og fjölskyldumeðlima þeirra.

Stjórn og stjórnendur sjóðsins leggja áherslu á að hafa góða stjórnarhætti að leiðarljósi í öllum verkum sínum.

Sjóðurinn hefur sett sér samskipta- og siðareglur með það að markmiði að koma á góðum starfsháttum, gæta að hagsmunum sjóðfélaga, tryggja að viðskipti séu stunduð af heilindum, koma í veg fyrir spillingu og mútur og hlúa að orðspori sjóðsins.

Reglurnar gilda fyrir stjórn, nefndir og ákveðið starfsfólk og fjölskyldur þeirra og er ætlað að tryggja vandaða starfshætti sem stuðla að trúverðugleika og koma í veg fyrir hagsmunaárekstra. Framangreindir aðilar þurfa að upplýsa sjóðinn um eignir sínar í fjármálagerningum þegar þeir hefja störf og upplýsa um breytingar á þeirri eign á starfstíma sínum.

Sjóðurinn hefur sett sér reglur á grundvelli laga nr. 140/2018 um aðgerðir gegn peningaþvætti og fjármögnun hryðjuverka. Með reglunum er leitast við að koma í veg fyrir að sjóðurinn verði notaður til að þvætta fjármuni eða fjármagna hryðjuverkastarfsemi.

Sjóðurinn hefur sett sér stefnu um ábyrgar fjárfestingar sem setur siðferðisleg viðmið fyrir fjárfestingar sjóðsins. Sjóðurinn leggur áherslu á að fjárfestingar hans uppfylli kröfur um samfélagslega ábyrgð, góða stjórnarhætti og sjálfbærni. Ábyrgð í umhverfis- og samfélagsmálum þjónar hagsmunum bæði fjárfesta og samfélagsins.

Brú ávaxtar fjármuni sjóðfélaga með heildarhagsmuni þeirra að leiðarljósi og leggur áherslu á faglega nálgun við fjárfestingarákvarðanir sínar. Að auki lítur sjóðurinn til viðmiða Sameinuðu þjóðanna um ábyrgar fjárfestingar (UN Principles for Responsible Investment (PRI)).

Sjóðurinn er í samstarfi við eftirtalin samtök og fyrirtæki sem stuðla með einum eða öðrum hætti að ábyrgum og sjálfbærum fjárfestingum.